中環出更：民記區議員關注「色情粟米」
早前將軍澳PopCorn商場發生冧假天花嘅意外，仲壓傷三個人，西貢區議員莊元苳抽水抽得勁快，即刻製作海報提醒街坊行經該商場時要小心，點知海報錯將PopCorn串為Porncorn，唔知仲以為該區多咗間色情粟米商場添！
宣傳品頻頻串錯字
其實民記嘅橫額同海報不時被發現串錯字，去年就分別有區議員將Merry Christmas（聖誕快樂）串錯做Marry同Christmax，認真係貽笑大方。不過，民記似乎仍未吸取教訓，做嘢仍然求求其其。好似莊元苳咁，將商場名串錯為Porncorn，照字面解即係「色情粟米」，真係好易嚇親班街坊。
我哋問過莊元苳，佢解釋趕住出海報，職員可能冇睇清楚就出街，好彩呢款海報只張貼喺屋邨範圍內，範圍唔算好大。當佢知道問題後已即時處理，仲提醒職員下次要校對清楚內容。話時話，民記議員逢親海報出錯，都係將責任卸畀職員，唔通冇膊頭都係民記嘅優良傳統？
卓妮