中環出更：菁英會交棒加強青年培訓
年輕人學歷愈來愈高，大學學位俯拾皆是，唔少大學生都大呻搵工艱難。香港菁英會尋日舉行第八屆執委會就職典禮，盧金榮（Wingco）從梁宏正手上接棒成為新一任菁英會主席。面對年輕人近年嘅情況及訴求，Wingco話，本地競爭的確比過往激烈，所以嚟緊佢哋會加強年輕人的培訓工作，等年輕人可以透過自我增值來提升自身競爭能力。
深明畢業生搵工難嘅Wingco話，會繼續搞多啲實質培訓同實習計劃，皆因創意同食腦先係本地年輕人最大賣點。升呢做司庫嘅廖偉麟及副司庫陳龍盛就透露，啱啱搵到香港賽馬會資助佢哋幫年輕人創業。陳龍盛認為，好多行業的創業成本唔高，好似寫手機應用程式就係其中一條路。
高松傑編app學樂器
講起寫手機app，菁英會理事高松傑就好有心得。佢原本經營音樂中心教吹色士風，後來發現傳統的教學模式有局限，於是就編寫手機app令學生重溫上堂學過的色士風技巧，未來仲會再出多個以針對色士風考試訓練嘅app。佢話，現時仲有義教二十個本地基層學生，諗住訂造啲樂器畀學生借用時，意外發現適合亞洲人使用的色士風，因而開始於台灣生產自己品牌嘅樂器。
同場仲有菁英會創會主席施榮忻、名譽主席吳傑莊及副主席甄韋喬等人。講到現時經濟市道差，吳傑莊話，年輕人最啱趁呢個時間增值自己，佢於二○○○年創業時正值科網泡沫爆破，經濟都係麻麻，結果證實只要把握到機會，一樣可以有收成。
卓妮