醜婦終須見家翁，有淫賤黎之稱嘅壹淫媒前主席黎智英向泛民秘密捐款醜聞已曝光超過一年，廉政公署查嚟查去得個吉，直到日前先至取得少少進展，有份收錢嘅社民連主席兼立法會議員梁國雄被召到廉署飲咖啡，總算有啲眉目嘞啩。呢單案其實唔係咁複雜啫，如果當局有心調查，早就應該了結喇。正如「東方報業民意調查」顯示，大部分市民批評調查進度緩慢，當局必須盡快交代，唔好又係不了了之。
話說舊年七月東方報業集團先後取得多批密件，揭發淫賤黎過去幾年向唔同泛民團體及個人秘密捐款超過四千萬元，醜聞曝光後，全城嘩然，鑑於民怨太大，廉署都唔敢怠慢，速速立案調查，而且曾突擊搜查淫賤黎及其洋助手嘅住所，而李卓人、何秀蘭、張超雄等被指收取黑金嘅泛民政客亦先後被廉署約談，點知查到依家仲係得個吉。
今次長毛被召到廉署，足足逗留咗三粒半鐘，唔知係咪顯示調查有進展呢？有前廉署人員估計，針對長毛個案，廉署可能已查到涉賄款項嘅去向同用途，相信案件已到尾聲，有足夠證據就會展開拘捕行動喎。講就係咁講，實際情形係點，不妨拭目以待。
話時話，黑金醜聞證據確鑿，連當事人都承認有畀錢，如果當局依法辦事，根本冇理由拖咁耐。係人都知，淫賤黎嘅秘密捐款全部通過有美國軍方情報背景嘅洋助手，加上佢本身多次被踢爆同美國政界高層過從甚密，如果話當中冇蠱惑，三歲細路都唔信喇。再講吖，壹淫媒近年經營不善，財政緊絀，旗下刊物唔係裁員就係停刊，政治黑金究竟嚟自何方，實在耐人尋味。
正如有立法會議員指出，淫賤黎秘密捐款「有根有據、有埋收據」，執法部門如果唔揸正嚟做，好難唔令人質疑當局係咪怕咗外國勢力。公道自在人心，上述民調亦顯示，唔少受訪者認為黑金醜聞涉及外國勢力，皆因當局有政治考慮，畏首畏尾，所以咪唔敢告囉。
難怪近年香港廉潔指數不斷插水，當局投鼠忌器，有法不依，處理淫賤黎黑金醜聞係咁，處理前特首曾蔭權爵士貪腐案亦係咁，廉潔指數唔跌至奇吖。學似古人話齋，國家之敗，由官邪也。香港回歸咁耐，亂足咁耐，固然因為妖孽為患，而港府姑息養奸一樣難辭其咎嘅咋。
點講都好喇，傳媒發揮第四權監督功能，踢爆政淫勾結醜聞，如果當局繼續拖泥帶水，唔止會進一步損害廉潔及法治，而且隨時激起更大民怨，盞唔衰攞嚟衰吖！