「地下秩序」四個字可能令人聯想到不太正派，甚至係電影中正邪主角大鬥法嘅場景橋段，估唔到連發展局局長陳茂波於最新網誌都以官方身份公開提及「地下秩序」，又形容似大家體內「血管」一樣支持有機運作。不過，大家唔好捉錯用神，其實佢係講緊龐大而精密嘅地下設施，用以維持城市嘅安全同有效運作。
波叔於最新網誌以《專業用心的「地下秩序」》為題，佢所指嘅「地下秩序」係包括各類管道，分別為市民供應食水同沖廁水、排洪、淨化同排放污水；另外有部分係創新嘅地下工程，以鞏固斜坡，以及開拓岩洞及地下空間以增加土地資源。
佢其後又硬銷已完成製作並正在播映，同樣以《地下秩序》為名嘅紀錄片，特別提到於「流水‧作業」一集，令佢印象最深係攝製隊爬入直徑不足一米嘅地下水管內部，拍攝工人修復水管內壁嘅情況，以減少水管漏水風險喎。