政情:沈祖堯話唔識拆政治炸彈

港府近年先後三次向立法會提出成立創新及科技局,不過三次均因激進泛民拉布而觸礁,外界估計立法會十月復會後,政府將會第四度就成立創科局闖關,身兼創新及科技諮詢委員會成員嘅中文大學校長沈祖堯幫手出口術,表明支持成立創科局,但當問及點樣解決拉布時,佢就話自己唔識解決政治問題,唔知呢啲係咪叫講就天下無敵,做就有心無力呢?

撐設創科局協調發展

沈祖堯尋日出席一個青少年科技創新比賽時話,年輕人喺創意、發明、研究方面都有相當好嘅成果,香港學生呢方面經常喺外國攞獎,但就因為冇環境培養佢哋,令佢哋未能夠將發明變成產品。

沈祖堯又話相比日本、韓國同新加坡,佢哋嘅科研已經走到好遠,強調香港唔係缺乏人才;又認為成立創科局有其用處,因為可以協調唔同部門、學界同工業界做好科研,希望大家可以互相合作,積極討論未來喺呢方面發展咁話。

第一手消息請下載on.cc東網iPhone/iPad/Android/Windows Phone Apps