中環出更：劉江華被打格惹不雅疑雲
仲有三個月就舉行區議會換屆選舉，大街小巷都掛滿區議員或社區幹事嘅宣傳橫額，而橫額一般用嚟做個人宣傳或政績介紹，部分相片都會夾雜同高官嘅合照，幫助政黨宣傳。有人發現民建聯社區幹事張子賢喺沙田大水坑選區嘅橫額，竟然將新任民政事務局局長劉江華嘅樣貌同姓名「打格仔」，唔通涉及不雅成分？
升呢做官 「不宜用於政黨橫額」
以「成功爭取」見稱嘅民建聯不時都鬧出笑話，今次張子賢嘅橫額內容係二○一一年發起嘅簽名行動，成功爭取喺區內候車處加建座椅，而橫額入面有兩個地方係印有劉江華嘅樣貌，但就畀人打咗格仔，令人感覺以為局長涉及不雅，甚至係無面見人。張子賢解釋，有關宣傳品係由其他同事負責，但劉江華依家已成為問責官員，認為不宜用於政黨橫額上。
事有湊巧，劉江華尋日出席沙田區清潔衞生活動，現場所見其徒弟、立法會議員葛珮帆（EQ）一度同劉江華「咬耳仔」，唔知EQ有冇趁機同師傅解釋吓，其樣貌被「打格仔」一事免得被誤會呢？
卓妮