中環出更：廠商想回流 嘆港缺人才土地
港資廠房北移內地設廠生產產品多時，主要睇中內地嘅生產成本無咁貴。不過時移勢易，內地近年生產成本有增無減，部分港商都心思思想回流返港，但基於土地及缺乏相關人才等問題，因而打消念頭；相反日本人就坐言起行。中華總商會青委副主席林智彬透露，同樣於內地設廠嘅日本人，唔少都搬番日本製造玩具。
家族經營玩具生意嘅林智彬解釋，日本廠家回流日本設廠，底因係日本擁有足夠土地，就算要設置大型機器都冇問題，加上目前有唔少日本人喺內地廠房做嘢，叫佢哋返自己國家應該好過留喺外地，所以唔少收藏級玩具，都搬番日本製造。
入行太少 機器太大
除咗玩具業，一批鐘錶業界都有喺內地設廠，好似鐘錶業總會副主席徐珊雯話，內地員工人工高、法規又時有改變，因此想將廠房搬番香港，不過佢哋嘅錶屬於勞工密集式生產，而香港造錶嘅人太少，所以再三考慮後都係搬唔到返嚟。此外，為咗開拓時鐘市場，佢哋已取得荷蘭博物館授權，將梵高名畫融入時鐘入面，仲特登搵英國相關專業人士將時鐘當藝術品造，希望可以走高檔路線。
身為鐘錶業總會副主席嘅九龍表行第三代後人黃雅芝則透露，總會已經同職訓局合作搞實習計劃，希望紓緩業界缺乏人才嘅情況。同場仲有「港版陀飛輪」品牌萬希泉創辦人沈慧林，早前其品牌嘅香港研發室開張，佢透露已將部分廠房由內地搬番香港，但要令手錶完全係「香港製造」就有難度，因為廠房機器太大，喺香港搵唔到咁大嘅地方可以容納到。講到尾，又係土地問題！
卓妮