古人話齋，少年智則國智，少年強則國強，少年進步則國進步。大學生係未來社會棟樑，應該集智、強、進步於一身至係，可惜現實同理想往往有距離，唔使講其他，淨係睇吓近年大學迎新活動七國咁亂，醜聞不斷，就好難令人樂觀咯。
嗱，暑假仲未結束，各大學嘅迎新活動啱啱展開，就已經有笑話喇。去年理工大學發生俗稱「暗Ｏ」嘅違規迎新營搶奪新生混亂事件，幾十人互相指罵推撞，好似黑社會講數咁，真係令人「Ｏ嘴」。以為今年會好啲嘞啩，原來又係咁，除咗一樣有「暗Ｏ」，而且有校外人士參加，搞到大學校園好似無掩雞籠，問你服未。
理大學生會近日踢爆最少五宗「暗Ｏ」活動，有人未經預約使用校內多個課室進行迎新活動，其中一個「暗Ｏ」有廿幾人參加，當中有理大新生，亦有校外人士，部分人甚至拖篋參加，都咪話唔大陣仗。咪以為參加「暗Ｏ」冇乜所謂吖，呢類迎新活動未經學生會評議會批准，並非學校承認嘅正式活動，既不獲保險保障，亦不設退款機制，新生即使受騙亦投訴無門，萬一出事仲大劑，唔知搵邊個賠償。仲有吖，部分「暗Ｏ」居然以貌取人，只錄取靚仔靚女，你話究竟為乜呢？
即係咁，年輕人鍾意熱鬧，搞搞氣氛，輕輕鬆鬆，本來無可厚非，問題係，如果一味追求低級趣味，甚至肉麻當有趣，搞到校園烏煙瘴氣，咁就唔同講法喇。大家有眼見，「暗Ｏ」活動固然備受非議，就算由學生會主辦嘅正式迎新活動，亦唔好得幾多。好似舊年咁吖，理大有段男女新生玩口傳食物嘅視頻被公開，而科大就被踢爆玩「撩陰人形毛毛蟲」，中大仲試過有男生玩到脫剩內褲添，如果孔夫子翻生，睇怕都要講句「吾不欲觀之」咯。依家雖然唔係男女授受不親嘅年代，但呢啲不雅場面出現喺大學迎新活動，始終唔係咁適合啫，係咪？
正所謂，教不嚴，師之惰，大學校園搞成咁，學生固然有責任，校方及教師亦有責任。隨着政治入侵校園，有啲教師教唆犯法，有啲學生鼓吹暴力，早前甚至有學生衝擊港大校委會及禁錮校委添，大學校園早就唔係清淨之地，迎新活動烏煙瘴氣又有乜出奇吖。
見微知著，大學校園其實就係成個社會嘅縮影。近年香港深陷政治泥沼，爭拗不休，亂象不絕，校園又點可能例外呢？所謂「大學之道，在明明德，在親民，在止於至善」，早就成為過去式，依家冇呢支歌仔唱咯！