政情：「史力加之父」搵老翻取經
一齣受歡迎電影好多時都會衍生出唔同類型嘅周邊產品，其利潤有時候仲大過電影票房本身嘅收益。不過，著名電腦動畫師及導演、有「史力加之父」之稱嘅許誠毅就話，有時盜版周邊產品仲出得快過正版，所以佢間中都會上網，參考吓盜版生產商點樣將電影內容融入商品之中。
學製電影周邊產品
許誠毅尋日出席中華總商會海峽兩岸暨港澳經貿論壇時，講起喺內地製作電影嘅經歷，話試過有一次齣電影啱啱拍好上映唔夠一個月，已有影迷拎住電影內其中一個角色嘅公仔過來索取簽名，令佢相當驚訝，皆因當時佢忙住拍電影，根本冇時間設計周邊商品，所以一睇就知道係翻版公仔喇！
雖然係咁，但佢發覺到周邊商品嘅潛力相當大，除咗參考外國一啲大公司點樣打造電影周邊產品外，網絡上嘅盜版商品種類亦層出不窮，盜版商品甚至比電影正版產品更厲害，所以佢有時都會上網學習將電影化成玩具，喺內地賺錢。