政情：盛傳炒魷 頻搞補鑊「蘇」
上月兩個問責局長被炒魷，有傳商務及經濟發展局局長蘇錦樑（Greg蘇）因為免費電視發牌風波及港台等問題，原本都喺炒魷名單之上，只因搵唔到合適接班人，先避過一劫。Greg蘇唔知係咪想補鑊，展示存在價值，最近頻頻曝光，尋日仲無喇喇搞個傳媒茶敍，美食車、電視發牌、以至近日嘅Uber召車服務等問題都有問必答，唔通Greg蘇真係驚被炒？
寸嘴又卸膊 有事張炳良
不過，講起美食車時，Greg蘇又不改寸嘴性格，話說佢聽日外訪智利及墨西哥，之後會順路去埋美國三藩市再睇美食車。對於立法會議員最終取消咗三藩市美食車考察團，Greg蘇就笑笑口話︰「反而我去到喎！」
早前該局轄下嘅投資推廣署推介Uber疑似甩轆，Greg蘇就補鑊話，其實署方每次都有同外商講解本港情況及相關法律，但始終公司嘅事得公司知。被問到係咪依家有關法例過時要修改，Greg蘇就拋番個波畀運輸及房屋局局長張炳良，話等張炳良答喎。佢呢份工真好做，得閒去考察遊吓埠，有事就「唔關我事」推莊，所以被列入炒魷之列，一啲都唔奇囉！