政情：街工女將出選 被當「忠」女
工會一向都係男士天下，其中街工多年來都係陽盛陰衰，但今年可能零的突破，終於有第一名女性準備參選，佢就係街工社區勞工幹事梁靜珊。原來唔少街坊以為佢係街工立法會議員梁耀忠個女，就連房屋署職員都問佢呢個問題。阿珊正積極考慮出戰葵盛西邨選區，挑戰現任議員工聯會劉美璐。
三姝競逐葵盛西邨
阿珊做咗社區勞工幹事十年，中間又讀過社工文憑，因為鍾意做社區發展工作，所以就決定喺街工做地區工作。除咗阿珊同劉美璐，上屆議員、公民黨前成員梁玉鳳都有意捲土重來爭位。三人都係女性，所以阿珊坦言，冇特別宣傳性別身份，其優勢係隔籬兩個選區葵盛東邨及興芳區議員，分別係街工周偉雄及民主黨吳劍昇擔任，算係有協同效應喎。
除咗街工，民協都出名少女將，但十一月區選就會派出廿六歲嘅社區統籌主任鄒穎恒（Zoe）出戰深水埗新區幸福選區。Zoe畢業於嶺南大學社會學系，畢業後擔任英文老師，兩年前應徵做立法會議員馮檢基嘅地區助理，咁快就出戰，足以證明民協幾咁冇人。