政情：邊境購物城象哥吸金大計
邊境購物城計劃講咗咁耐，啱啱先交咗去城規會諮詢，都唔知幾時先至成事。有份倡議計劃嘅立法會進出口界議員黃定光（象哥），早前已經加入咗負責計劃嘅非牟利基金會，仲話基金會已經密密開會，計劃購物城各項大小事情，其中一項最重要嘅竟然係諗計處理旅客購物期間留下嘅大小二便，而初步計過條數，以每日過百萬人流計算，估計每月要花一百二十萬元去吸糞！
排污渠唔批 變蓄糞池
一個人可以忍口唔食嘢，但大小二便就好難忍，廁所就係邊境購物城其中一個首要解決嘅問題。象哥話，本來諗住好簡單，只係放幾間一格格嘅臨時廁所就搞掂，點知購物城人流太多，相關嘅政府部門話唔可以兒戲。象哥於是諗計變招，研究興建廁所，之後駁落政府嘅排污渠，但渠務署又話啲渠負荷唔到，唔批准咁做。
象哥之後就諗到解決方法，就係起個蓄糞池，每晚搵九部吸糞車到場吸糞，咁樣計一計，淨係吸糞，每日都使四萬元，一個月要成一百二十萬元，都幾重皮喎！除咗吸糞，象哥話計埋其他使費，預計每個月開支要成千萬元！佢解釋，邊境購物城將會向銀行借貸約一億二千萬，分廿四期還款，每期還五百多萬元，其餘四百多萬就係日常營運開支。
計劃未落實 唔敢簽約
象哥話，可能因為最近有鉛水、天津爆炸、曼谷炸彈爆炸等新聞，令到邊境購物城到目前為止都冇咩太大嘅反對聲音，希望九月喺城規會順順利利，一日就通過。不過，佢話依家個計劃未過城規會，所有嘢都唔敢正式簽約住，費事一個唔覺意拖得太耐就唔好喎。咁多波折，如果最後搞得成，象哥真係要劏雞還神！