中環出更：小肥張輪椅賽快過金牌選手
香港傷殘青年協會由尋日起一連五日於荷里活廣場舉行健障歷奇體驗活動，讓健全人士體驗殘疾人士喺歷奇時遇到嘅困難。勞工及福利局局長張建宗（小肥張）就試玩咗其中一項歷奇訓練「霹靂啪啦過沼澤」，佢坐喺手動輪椅上越過石春／視障引路徑，以體驗輪椅使用者於凹凸不平嘅路面上行走情況。佢一開始就出盡力起勢推動輪椅，搏老命向前衝，遙遙領先，快過世界輪椅劍擊金牌得主張偉良。
張偉良讚「一學就上手」
張偉良賽後大讚小肥張一學就上晒手，但小肥張坦言使用輪椅唔係容易嘅事，但認為遇到挫折後要勇敢起身再試，不可輕言放棄，自然會成功。今次健障歷奇體驗活動，市民只需捐款六十元即可挑戰，籌得款項將作為香港傷殘青年協會營運經費之用。
本港現時較具規模的殘疾人士戶外設施地點只有三個，惟早於一三年，殘疾人士人數已有近五十八萬，活動空間比例嚴重失衡，協會建議政府應增撥土地資源開放無障礙活動空間。
卓妮