中環出更：黃金寶講生B：兩個夠晒數！
夏天最好係一家大細出外活動，尋日卓妮就喺一個室內歷奇活動啟動禮見到兩位前運動員，分別係「亞洲車神」前香港單車運動員黃金寶（阿寶），同埋「蜘蛛女」前健美運動員鄭麗莎（Lisa）。阿寶月初榮升做爸爸，而Lisa個囝囝都十個月大，兩個相遇當然討論吓湊仔經啦！
原本阿寶出席唔到活動，事關佢太太預產期喺呢幾日，但佢囝囝已經出咗世，所以抽到時間出席。
蜘蛛女湊仔秘訣：笑多啲
問到新手爸爸湊仔有冇困難，佢就話囝囝好乖，只係一到夜晚就唔願瞓覺，搞到佢兩公婆都無晒辦法喎。Lisa於是過咗幾招湊仔大法畀阿寶，佢話要對住囝囝笑多啲，多啲笑容就會令囝囝開心啲、輕鬆啲。Lisa又話，最好晚上六點至九點期間搞醒囝囝玩吓，咁囝囝玩完就自然會眼瞓，然後好快就瞓得着。
講起囝囝，卓妮就順勢問下兩位會唔會考慮追多個啦！Lisa同阿寶都話想追多個，Lisa仲話想生夠六個，早前生完已經想即刻再追多個。而阿寶就好錫老婆，話等老婆身體休息好先再追，但兩個就夠晒數喇！至於會否培養囝囝做接班人，本身係跆拳道藍帶嘅Lisa話，佢同老公都會帶囝囝去睇跆拳道比賽，囝囝仲睇到手舞足蹈，大個啲就可以學。而阿寶就話唔會要求囝囝一定要踩單車，話會尊重番囝囝嘅意願喎！
同場仲有籌委會主席龐愛蘭（Scarlett），佢話平日都無乜點做運動，只係中學時代有玩跳遠同風帆，仲同卓妮講以前去過一個玩風帆嘅營，最後一日仲因為畀蜈蚣咬傷腳所以無得考試添。Scarlett仲話，十月會去澳洲探讀書嘅囝囝，依家已計劃緊行程，希望到時兩母子一齊做吓運動增進感情。
卓妮