俗語話，發財立品。一個人發咗達，應該行善助人，一間企業賺大錢，更加應該提升服務質素，回饋顧客。可惜吖，講係咁講，實際上係另一回事，尤其係醜聞不絕嘅國泰航空公司，發財立品就冇嘞，店大欺客就有。
嗱，國泰尋日公布上半年業績，雖然略遜於市場預期，但依然賺到盆滿缽滿，中期純利近二十億元，按年增長逾四點六倍，簡直係豬籠入水。
咁就奇嘞，國泰醜聞多多，投訴仲厚過電話簿，居然仲可以盈利大增，唔通乘客真係冇得選擇？冇錯嘞，國泰壟斷香港大部分航線，其他航空公司根本冇得競爭，乘客想揀都冇得揀。
即係咁，國泰賺大錢，又自詡為香港人嘅航空公司，係咪應該發財立品，做到物有所值呢？可惜事實啱啱相反，淨係航班延誤當食生菜，已經有口皆悲，至於安全事故接二連三，更加令人不寒而慄。呢，日前一架由新加坡飛香港嘅國泰航機，起飛冇耐，機長突然廣播話飛機着火，搞到要緊急折返；早前國泰又試過飛行途中機艙探測出煙霧，搞到要急降美國阿拉斯加軍用機場，問你怕未。
咁仲唔止，機票超賣搞到糾紛不斷，累人累物，最令乘客谷氣。連國泰姊妹公司港龍亦係咁，有乘客日前由香港飛海口，因為機票超賣而無法上機，直到乘客報警至獲候補機位，結果人到行李仲未到，有冇再離譜啲吖？呢啲只係冰山一角咋，有國泰乘客直情因為超賣而上唔到機，被當人球咁踢，簡直係貼錢買難受。
最無恥嘅係，國泰仲大條道理，聲稱超賣係行規喎。喂，一手交錢，一手交貨，乘客畀晒錢而上唔到機，國泰已經涉嫌觸犯《商品說明條例》喇，點可以一句行規就惡晒？講到尾，航空公司之所以有恃無恐，皆因佢哋無王管囉，消委會及海關雖然接獲大量投訴，但從未採取任何行動或檢控，國泰仲唔打橫行咩。所以話，一個巴掌拍不響，國泰服務水準不斷插水，港府都有責任。
嗱，乘客眼睛係雪亮嘅，喺一個旅遊網站嘅最佳航空公司選舉中，國泰排名由全球第一跌至第三位，今次已經係今年三連跌，證明國泰臭名遠揚。咁又難怪嘅，國泰發財唔立品，一時延誤，一時超賣，唔止對乘客傲慢，而且對員工刻薄，排名唔跌至奇吖。花無百日紅，國泰繼續自甘墮落，遲早被人唾棄嘅咋。