今屆立法會增加咗十個議席，但「陽盛陰衰」嘅情況依然無變，事關女性議員數目同上屆一樣無增加到，都係得十一位女議員，而男性議員就多咗成十位。根據立法會最近嘅統計資料，鄉議局立法會議員劉皇發（發叔）就以七十九歲之齡成為最年長議員，最年輕議員分別係勞工界議員鄧家彪及漁農界議員何俊賢（高佬賢）。
幾年前做嘅統計，同今次最新做嘅統計變化不大，發叔依然係最年長嘅議員，而鄧家彪同高佬賢亦係最年輕嘅議員，而上屆最年輕議員就係陳克勤。不過，隨住呢幾年嘅年歲增長，令立法會議員嘅平均年齡亦相對拉高，截至七月底為止，立法會議員嘅平均年齡為五十八歲。
經歷去年嘅佔領行動之後，好多後生仔都組成咗傘兵組織，例如「青年新政」，仲講明會參加十一月區議會選舉。下屆立法會選舉會明年就舉行，唔知班後生仔又會唔會蠢蠢欲動玩埋一份，一個唔覺意選到，有望拉低立法會議員嘅平均年齡，隨時仲可以平衡返男女議員比例添。