中環出更：恐襲陰霾 楊華勇遊泰忐忑
七、八月份係旅遊旺季，但日前泰國曼谷發生大爆炸慘劇，打亂咗唔少人嘅旅遊計劃，部分已經訂晒機票及酒店嘅人為安全計都立即更改行程，轉機票去其他地方。卓妮尋日喺一個酒會上見到中華總商會常務會董楊華勇（Johnny）及太太莊菲娜，原來佢哋月底本來打算去布吉玩，但依家就十五十六，唔知去唔去好。
尋日美國家得路天然健康食品喺銅鑼灣有新店開張，與執行董事及總裁陳家偉（Calvin）老友鬼鬼嘅Johnny帶埋太太去捧場，講起早幾日曼谷爆炸慘劇，Johnny就話目前心大心細，皆因去布吉嘅所有嘢都已經一早訂好晒，取消又唔係，但照去嘅話唔多唔少都會有啲擔心，雖然布吉同曼谷始終有一段距離，但都盡量避免前往人口密集嘅景點。
現身捧場嘅仲有Calvin喺香港中華廠商聯合會嘅一班手足，包括青委主席張永鴻、副主席吳景灝、顏明秀、劉子芸、黃浩鈞及王詩雅等。提到健康生活習慣，除咗飲食，配合運動亦好緊要。啱啱去完菲律賓旅行返港嘅顏明秀就最鍾意做運動，佢話今次喺當地潛水有意外收穫，就係見到成個人咁大隻海龜，對於有養龜嘅佢嚟講格外驚喜，仲拍低咗唔少相片及短片添。
陳家偉逆市開新店
對於近期零售業處於寒冬，唔少大型連鎖店都要開源節流減分店，Calvin反而逆市開分店，佢話係因為其客源大部分係香港人，所以個人遊減少對生意影響不大，加上租金回落，佢哋多咗地點選擇，嚟緊一年預計會繼續擴張。
卓妮