「衣食住行皆不易，生老病死樣樣難」，本報「探射燈」指出：住不安心，移民潮將現——皆因空氣質素差，何況近日又大爆鉛水危機，不單止公屋、私樓，甚至豪宅一樣有鉛水問題，阿哥，吸啖空氣，飲一口水都要擔驚受怕，你話香港係唔係已步入倒退年代？
老朽讀吳昊之「老香港」懷舊之作，其中講到「第一代水喉管」——原來係竹筒運水，當年，黃泥涌的山澗成為港島的重要水源，政府的工務人員參考中國傳統的農業灌溉技術，把竹筒駁接成一條長長的輸水管，把水運到去附近洋人住宅區。此種第一代水喉管竟給紀錄在一幅古畫裏，就是一八三八年Auguste Borget所繪的A Bamboo Aqueduct（竹製導水管）。觀其畫，但見山澗雄偉水源充足，澗上橫架着竹水管，而港人的食水供應就全靠佢喇！
如今時代進步，竹水管變鉛水管，確係「鉛來無法擋」，而生產嘅食物，光怪陸離，目迷五色，甚麼孔雀石綠魚、蘇丹紅雞蛋、保鮮劑化學水果……唔好以為呢啲毒食品只在內地發生，事實上，本港食品安全問題亦警鐘頻鳴，皆因港產官僚反應遲鈍加上把關不嚴，尤其在廢官周一鑊擔任「食物及衞生局局長」時，本港嘅醫療事故及食物問題多籮籮，令人「忘不了他」！香港空氣差，嚇走外來人才，其實已不是新聞；早前便有學者親證「空氣污染嚇跑了一位有實力問鼎諾貝爾獎嘅經濟學家」！
至於我哋小市民，幾唔開心點樣難，每人每日依然必做五件事：吃、喝、拉、撒、睡；吃——依然佔首位。有個笑話：兩個中國人在廁所裏碰面，往往相互都要問聲：「吃了嗎？」就像德國人打招呼：「合乎規定嗎」一樣的平常。如今，在一個倒退的年代，或許街上偶遇朋友會驚呼：乜你呼吸冇問題咩？條氣咁順，講嘢咁大聲嘅！