政情：「蓮花」速謝 天文台播片解畫
上月颱風「蓮花」襲港來去匆匆，天文台發出八號烈風訊號短短五粒半鐘就謝咗，令到唔少想放多日假嘅打工仔失望。政府新聞網尋日發放咗一段天文台科學助理梁桂江嘅訪問短片，講述佢乘坐飛機到「蓮花」風眼收集數據嘅經歷，唔知係咪有意為「蓮花」速謝幫天文台解畫呢？
飛行服務隊換新機做測量
參與收集颱風數據已有五、六年嘅梁桂江喺訪問中形容，颱風來襲時一定不能掉以輕心，上月「蓮花」襲港期間，佢曾經隨機監測，「飛機震動得很厲害，我已繫上安全帶，但仍感到快要被拋離座位似的。」幸而「蓮花」匆匆掠過本港，無造成太大破壞，但係佢強調：「上次可能只是運氣好，風力恰巧減弱了。」
政府新聞網亦訪問咗政府飛行服務隊機長鄺志淇，佢話平日執勤時會盡量避免去天氣惡劣嘅區域，但觀測天氣嘅工作就啱啱相反，偏要往壞天氣嘅區域鑽，才能準確掌握天氣。訪問又提到，飛行服務隊稍後會更換機隊，喺新機裝上發射器，以便將來飛到熱帶氣旋頂部，再投下垂直探空儀，從颱風內部錄取數據，改進測量風暴強度嘅準確性。