立法會三個勞工界功能界別議席，一向由工聯會（工記）同勞聯「二一分」，而工記內部規定兩名勞工界議員最多只能做一屆，完成四年任期就要讓畀新人上位，自己再轉戰地區直選或收山摺埋。工記早前已物色咗五名區議員做來屆勞工界議席嘅「候選人」，本來五個人爭兩個位已經好激烈，但最近再傳出現任勞工界議員郭偉強密謀扶本身為元朗區議員嘅大舅姚國威上位，接任其議席。如果傳聞屬實，豈不是將勞工界議席變成世襲？
姚國威本身係郭偉強太太嘅哥哥，亦同下屆勞工界議席熱門接班人之一、另一元朗區議員陸頌雄有師徒情分。知情人士透露，郭偉強本身同姚國威係多年好友，加上姻親關係，所以有私心想將議席讓畀大舅。不過，郭偉強下屆要由勞工界轉戰直選，難聽啲講句，佢都自身難保，如果仲想傳位畀大舅，似乎有點吃力。
我哋問過郭偉強，佢直指呢個傳聞好搞笑，強調邊個接棒並非由佢話事，首先要得到工記支持，再向各大工會推薦。不過，佢同時大讚大舅喺地區上好勤力。至於姚國威本人，我哋就暫時搵唔到佢回應。