中環出更：余鵬春「暫撐」林健鋒保議席

政改表決大「甩轆」後，政界一度盛傳立法會總商會代表林健鋒（Jeffrey）須為事件問責，議席隨時不保，其中一個傳聞挑戰者係現任總商會理事、裕華國貨董事總經理余鵬春，另有傳自由黨亦有意派人收復總商會呢塊失地。不過，其後又有消息話，中央已就「甩轆」事件重新定性，認為當時拒絕跟大隊離場嘅自由黨先係「甩轆」罪人，Jeffrey爭取連任應該問題不大。我哋尋日喺一個活動上撞到余鵬春，問佢Jeffrey連任立法會，佢就語帶曖昧咁話，「暫時嚟講」大家都係支持林健鋒，其他嘅嘢就遲啲再講。唔知佢係咪仲等緊機會呢？