中環出更：Q嘜食家保健各有妙法
香港人個個都識飲識食，對美食嘅觸覺亦特別敏銳。卓妮尋日喺美食博覽見到香港優質標誌局（簡稱Q嘜）主席丁煒章，非常鍾意食嘢嘅佢笑言，自己識食唔識煮，唯獨是對煎牛扒特別有心得，皆因佢係一個不折不扣嘅「牛魔王」。佢解釋，自己細個本來都唔係特別鍾意下廚，但中學時喺海外留學，對食物有要求嘅佢，食唔慣當地食物，就忍唔住開始親自下廚煎自己最愛嘅牛扒食喇。
香港優質標誌局尋日喺會展美食博覽展場內，舉辦「2015Q嘜美食寶寶選舉」，主席丁煒章、Q嘜委員孫榮聰（Eric）與弟弟孫榮良、委員吳宏斌、名譽會長孫啟烈及鍾志平等均有出席，為一班擔任Q嘜美食小「煮播」嘅小朋友評分。
吳宏斌講究食物賣相
吳宏斌及鍾志平都係超級鍾意食海鮮嘅人，鍾志平早前仲去咗日本大擦新鮮水產，笑言自己一把年紀，唔怕輻射，所以可以盡情咁食。至於吳宏斌就至愛食蟹，佢話知道自己食多咗嘢嗰期，就會做番多啲運動，例如打網球同高爾夫球消耗番。雖然佢唔識煮餸，但做珠寶行業嘅佢對食物嘅賣相、伴碟點擺先至靚等都特別講究。
至於Eric爸爸孫啟烈就坦言，最好食嘅嘢通常都最唔健康，所以佢會每日沖靈芝沖劑嚟飲，唔知係咪因為咁，每次做親身體檢查時雖然ＢＭＩ超標，但仍然冇咩特別病痛，連醫生都吹佢唔脹咁話。巧合地與爸爸一同着咗套格仔衫父子裝嘅Eric，睇落就清瘦咗唔少，雖然家中有孫榮良呢個識煮嘢食嘅細佬，令佢可以大飽口福，但近年佢都好留意自己體重，好似Ｍ９等牛扒脂肪太多，一世人食一、兩次都夠晒，平日食啲普普通通嘅就夠喇。依家佢每星期會做兩次健身，每次做兩小時，要保持健康身形喎。
卓妮