弱勢政府百事哀。港府施政無能，動輒得咎，拓地建屋同成立創科局等大計固然阻力重重，諗唔到連管理樹木咁小事都觸發爭議，你話係咪悲哀吖。
話說早前超級颱風蘇迪羅逼近香港，狂風驟雨，風雲變色，當局擔心港島般咸道冧樹事故重演，急急將當區四棵百年老樹斬去，連日來引起各界炮轟。環保人士批評，四棵老樹明明健康無問題，當局居然判處極刑，等於濫殺無辜，要求詳細解釋，有政黨更加向申訴專員投訴，話要追究殺樹兇手喎。喺群情洶湧之下，樹木辦尋日撰文回應，話向來視樹木為朋友，惟莫測天氣加上樹木狀況惡化，促使作出伐樹決定；佢哋仲形容，有關決定「困難但理智」，「把市民安全置於首位」，承諾未來會檢視工序，做好通報工作喎。講咗咁多，咪就係推卸責任囉。
即係咁，當局兩面不是人，斬樹斬得太急畀人話濫殺樹木，但係斬樹斬得太慢，萬一再發生冧樹傷人事故，又畀人話後知後覺，表面睇好似好無奈，實際係自己一手造成。唔係咩？全世界都會打風落雨，其他地區管理樹木順風順水，但港府就爭議不絕動輒得咎，歸根究柢，咪因為港產官僚窩囊囉。講真，如果樹木辦平日做好自己份工，將樹木管理得頭頭是道，贏得市民嘅口碑同信任，斬樹決定又點會觸發咁大爭議吖？所以話，種瓜得瓜，種豆得豆。港府管理樹木劣迹斑斑，今日備受質疑根本係咎由自取。
咁講喇，當局今次嘅斬樹決定係咪正確，有待進一步論證，不過樹木辦聲稱把市民安全置於首位，就肯定言不由衷嘞。嗱，樹木專家就講得啱嘞，當局應該吸取今次教訓，徹底改革樹木風險評估方式，提高診斷樹木嘅準確度，以及建立樹木專業及技術人員資歷架構，防止濫竽充數，咁至稱職吖嘛。話時話，港府缺乏樹木專家，管樹官僚泥沙俱下，早已唔係新聞，如果唔係，樹木辦就唔會畀人話廢柴喇。環保人士批評得冇錯，當局唔夠專業水平評估樹木健康狀況，為怕出事孭鑊，唔理三七廿一下令斬樹，咁同黃綠醫生亂診症差唔多嘅咋，一個害死人，一個害死樹，都係咁無良。
唔講猶自可，講起把幾火。幾年前港大女生喺赤柱畀大樹壓死，港府急急補鑊，成立樹木辦統籌樹木管理工作，大家諗住可以拆除都市炸彈，行樹底戴頭盔嘅日子可以遠離，點知樹木辦尸位素餐，毫無建樹，多來年冧樹危機唔單止冇解除，仲不斷惡化，搞到奪命慘劇不絕如縷。
點講都好，香港正處於颱風季節，加強樹木管理工作刻不容緩。功夫茶無嘢驚，最驚管樹官僚渾渾噩噩，唔應該斬嘅樹就亂斬，應該斬嘅危樹反而唔去斬，萬一又搞出人命，咁就該煨囉。