政情：公民講場：詹前顧樹籲勿塌一誅百

政府早前漏夜移除半山般咸道石牆樹，做法受到外界質疑，但樹木管理辦事處尋日就發表文章反擊，話理解市民同團體對移除石牆樹感到可惜，但早前颱風「蘇迪羅」出現時，本港收到至少四十宗塌樹報告，強調喺考慮樹木保育價值嘅同時，當局更須重視公眾安全。不過，一向關注樹木嘅香港大學地理系講座教授詹志勇，尋日出席電台節目時話，如果要斬重要樹木，就必須提供充足科學、客觀、合理嘅證據，管樹人員唔可以杞人憂天、杯弓蛇影、塌一誅百喎。如果當初決定唔斬幾棵石牆樹，咁啱喺加固前真係不幸塌下造成傷亡，到時又邊個負責呢？