成功先例極少
做過中總會長嘅人再任會長嘅先例極少，最有印象係前全國人大常委、中總永遠榮譽會長曾憲梓。事實上，現有八名中總副會長排緊隊上位，包括排首位嘅袁武，仲有莊學山、李德麟及林樹哲等人，就算未必人人急住做會長，但只要有人唔想被爬頭就有排煩。
此外，中總常務會董方文雄多次被傳係中總領導層或立法會中總議席繼任人選大熱，外界估計方文雄或等待合適時機更上一層樓。所以若蔡冠深決定翻兜，阻力認真唔細。
我哋向蔡冠深查詢，但截稿前仍未回覆。袁武就笑笑口話未有聽聞此事，強調中總明年十月先至換屆，現時談論誰做會長言之尚早。佢仲指指自己個頭話：「頭髮白晒喎！」似乎暗示無意競逐會長。