政情：陳家珮拜天公當度蜜月
新民黨南區海怡西區議員陳家珮（Judy）去年補選大勝其他對手，但今年底又到區議會選舉，啱啱結咗婚幾個月嘅佢透露一直都仲未敢放低地區工作去度蜜月，淨係早前返咗丈夫家鄉廈門同啲親友一齊拜天公，體驗咗幾日特別嘅傳統習俗，就當係度咗蜜月。
備戰區選 唔敢遠遊
本身係廣東人嘅Judy，首次體驗拜天公傳統習俗，原來全晚會不停燒炮仗同奏樂直到天光，而佢就要用件衫接住化完嘅元寶，接得愈多愈好，象徵平安健康等祝福。雖然Judy唔係好聽得明啲親戚講咩，但見親戚搵小朋友喺佢張床上面碌來碌去，就估到係希望佢兩公婆可以快啲添丁咁解，而佢都希望快啲生番個。
講到心目中理想嘅度蜜月地方，Judy就話丈夫鍾意俄羅斯聖彼得堡，而佢就覺得意大利、捷克及馬爾代夫都唔錯。不過，佢話要專注地區工作，加上上次補選時嘅對手人民力量袁彌明喺該區租咗個舖位不時搞活動，所以佢都唔敢鬆懈。