政情：渡海泳賽 議員鬥「潛水」
維港渡海泳將於十月中舉行，呢個活動每年都吸引唔少人參加，當中包括立法會議員，好似金融界吳亮星（星爺）、會計界梁繼昌、紡織及製衣界鍾國斌（Felix）、體育、演藝、文化及出版界議員馬逢國、胡志偉等，都不時出現喺參賽者名單上。不過，今年一班議員藉口多多，有人話用水泡比賽好肉酸；有人就話唔知對方有無幫自己報名參加；有個仲口頭報名就算，真係誠意欠奉，不如話唔參加好過啦！
今年渡海泳依舊喺維港上演，參加者由鯉魚門三家村公眾碼頭游去鰂魚涌公眾碼頭，全長一點五公里。參加者真正落水比賽前，需要先進行試水，合資格先可出賽。睇番過往紀錄，一班議員試水時已經發生唔少蝦碌嘢，包括游得太慢達唔到參賽要求、跣腳及抽筋等；去年比賽當日更只有馬逢國出席，但佢只喺船上做啦啦隊幫參賽者打氣。講到尾，真正落水嘅議員真係冇乜邊幾個。
連自己有無報名都唔知
至於今年，莫講話比賽當日會否甩底，好多人根本無報名，甚至連自己有無報名都唔知。馬逢國話自己剛剛「登六」，要出示醫生證明先可以參加，但佢抽唔到時間做身體檢查，最終不了了之。星爺就話一向係由馬逢國代為報名，但唔清楚今年報咗名未。其實比賽喺八月初時已截止報名，加上馬逢國自己都冇報名，所以應該都唔成事。雖然星爺話自己日日至少練水半個鐘，有信心完成賽事，但睇怕佢今年都係同比賽無緣喇！
至於Felix前年唔使三十八分鐘就游畢全程，因而被冠以「立法會飛魚」美譽。我哋問過Felix，佢講明今年唔會參加，因為十月忙於立法會事務；加上名人參加嘅優悠組規定參賽者用水泡，以確保安全，但佢就覺得「飛魚」用水泡比賽好肉酸。佢又聲言，如果今年參賽，一定可以破上次紀錄，但事實係咪咁就要落到場先知。同樣信心十足嘅胡志偉，話之前同咗主辦機構講會參加，但目前仍未掌握到細節，最近忙於地區工作，水都冇乜點練喎。講到咁，睇嚟都係甩底居多。