中環出更：台中團訪港 賣糕讚糕香
港人好鍾意台灣手信，但當地食品安全問題時有所聞，都唔知點算好。被稱為台灣「糕餅之鄉」嘅台中，早前由市政府秘書長黃景茂率團來港舉行宣傳騷，帶來當地美食及旅遊優惠畀港人做手信。黃景茂話，台中好多糕餅老店出品由產地到銷售係一條龍作業，減少咗運送期間嘅污染風險，所以遊客可以安心選購咁話。
早前香港逾百人食用台灣洪瑞珍三文治而中毒，洪瑞珍總店喺彰化縣，咁啱該縣政府城市暨觀光發展處處長田飛鵬亦有到場。佢話事件未對當地旅遊造成太大影響，仲話當地有好多美食及旅遊景點，日後將多啲同毗鄰嘅台中一齊宣傳喎！
當地豪宅呎價僅4000元
最近唔少港人到台灣買樓移民，氣候接近香港嘅台中亦係港人置業嘅熱點之一，唔少豪宅呎價都只係三、四千元港幣。台中市經濟發展局副局長李逸安話，台中嘅樓價平過台北，台北樓價又平過香港，所以有優勢吸引包括香港人嘅外來移民者。近年亦有唔少香港學生到台中讀大學，令兩地交流日益頻繁。由於由軍用機場改為民用嘅台中清泉崗機場設施老舊，佢哋正爭取改建成為具國際水準嘅機場，以提高服務質素。
台灣觀光局香港辦事處主任巫宗霖、港澳台灣同鄉會會長邱文潛及國際華商協進會候任會長羅台秦亦有出席宣傳騷。邱文潛見到咁多美食忍唔住食多幾件，佢話關注糖尿病嘅人唔使驚，因為現場好多食品不加普通蔗糖，食多兩件都唔怕喎！
卓妮