《孫子兵法》云︰「兵之情主速。」其實唔止行軍打仗講求快速，經濟民生亦唔例外，睇啱時機就要坐言起行，否則，拖泥帶水，坐而論道，只會一事無成嘅咋。
好似邊境購物城咁吖，講咗N咁多年，依家至話有啲眉目喎。負責相關項目嘅基金會向城規會提出申請，將新田村路一幅四萬平方米土地，由現時嘅臨時公眾停車場、貨櫃儲存庫改為臨時邊境購物城。據講購物城計劃倣效歐洲、加拿大同美國等地流行嘅村莊概念購物商場，將貨櫃改裝成商舖，其中約一半指定售賣香港製造或香港設計產品，以支持本地產業咁話。
聽落就幾吸引嘞，但最終可唔可以成事以及幾時成事，仲要睇過至知。事關向城規會申請改變土地用途只係第一步，購物城嘅選址依家仲係爛地，交通等配套設施興建需時，而且仲要通過地區人士同保育團體等種種關卡，唔係咁易。係人都知，購物城主要招呼內地旅客，激進團體肯定會搞風搞雨，唔知要拗幾耐，就算最終搞得成，都可能變成明日黃花啦。
大家有眼見，近年中港矛盾不斷升溫，個人遊旅客買少見少，加上內地陸續下調日用品進口稅，香港嘅吸引力大打折扣。尤其係人民幣近期大幅貶值，大大影響內地客來港意欲，只要睇吓跌跌不休嘅零售數字，就知環境有幾惡劣。有人話零售業已進入寒冬，唔係冇理由。蘇州過後冇艇搭，購物城早唔起，偏偏等到旅遊業走下坡嘅時候起，你話係咪搵嚟搞吖。
唔怕唔識貨，最怕貨比貨。同樣係購物城，香港一味歎慢板，而深圳前海嘅「港貨中心」最快年底就可以落成，整個籌劃過程一年搞掂，唔到你唔服。以前令港人自豪嘅「香港速度」一拍埋「前海速度」，相形見絀，簡直丟架！
見微知著，購物城坐失先機，只不過係香港蹉跎歲月嘅縮影咋。例如發展創新科技咁吖，港府吹到天花亂墜，可惜講就天下無敵，做就有心無力，淨係成立創科局已經爭議不絕，唔知仲要拖到幾時。香港科技落後，莫講話比唔上南韓、台灣、新加坡，同深圳比都輸足九條街。又例如機場興建第三條跑道，一樣係爭拗多多，阻力重重，反觀周邊城市，有啲已經起緊第五條機場跑道喇。唔怪得有人話，拖得兩拖，香港連航空樞紐地位都不保，第三條跑道起唔起都罷啦。
冇計喇，競爭對手不斷進步，香港就原地踏步，連興建一個購物城都拖拖拉拉，議而不決，再咁落去，香港遲早變番小漁村嘅咋！