政情：新社企教基層煮私房菜
香港社企有好多發展空間，而香港社會創投基金創辦人魏華星（Francis）最近就策劃緊一間新社企，培訓一啲基層市民，包括南亞裔人士學煮各種特色菜式例如咖喱等，及安排到會，提供類似私房菜嘅另類美食。Francis話，依家樣樣嘢都講求健康同環保，一班朋友放假想聚吓，喺屋企食飯一樣咁開心，如果可以有人上門幫手煮餸，煮完之後又有人負責洗埋碗碟，聽落幾吸引，亦可以幫助基層市民融入社會。
魏華星擬推自攜樽文化
百足咁多爪嘅Francis除咗推廣素食及跑步運動習慣外，仲計劃宣揚自攜水樽文化。佢話一個社企唔可以永遠賣愛心，因為市民可能只會買一兩次，但唔會買一世；相反養成對社會有持續幫助嘅習慣先係最有效用，好似佢哋嘅「光房」計劃咁，目前已有三十多個私樓業主，以低於市價租金租畀由社工轉介、有住屋困難嘅單親婦孺，約半年後於深井仲會再有一棟大廈提供約四十多個單位，解決單親媽媽嘅苦惱。