財政司司長曾俊華喺今年財政預算案提出要學外國搞美食車，但十畫都未有一撇。立法會食物安全及環境衞生事務委員會主席張宇人（Tommy）急急提出暑假去美國考察，睇吓當地嘅美食車點營運。呢個建議早已受到不少議員質疑，加上今年暑假正值區議會選舉前夕，雙料議員更加分身不暇，結果只有三位議員出訪，而佢哋原定喺紐約嘅行程亦都因為當地團體未能接待而取消。唔知係咪人丁單薄，當地團體都懶理佢哋呢？
呢個「迷你兵團」可以話未出發就先一波三折。首先因為其中一站三藩市下月中有大型會議，酒店房間供應緊張，令到出發日期要由下月十三日改到二十日出發。
點知立法會秘書處日前又通知外訪議員，因為紐約當地部分接待團體未能接見，所以決定將今次行程改為只去三藩市一個城市，原定七日嘅行程亦縮至五日，即下月廿二日出發，廿六日凌晨返港。
山長水遠去到只逗留三日多啲，仲要被當地團體冷待，真係唔去好過去喇！