政情：民陣火棒無人敢接
佔領行動以失敗告終，令泛民主派嘅政治能量大幅減弱，連帶負責遊行示威嘅民間人權陣線（民陣）政治影響力亦大不如前。民陣今年十月就會舉行一年一度嘅換屆選舉，有傳四名正副召集人都會齊齊裸退，落莊之後唔會再喺民陣擔任任何職位。換莊本身好正常，但截至現在，民陣召集人接任人選都仲未明朗化，好大原因係召集人呢個位根本係燙手山芋，吃力不討好，所以無人肯做。
陳倩瑩「召」完鬆去打工
民陣身為協調泛民示威行動嘅組織，佔領行動期間本來應該坐擁大權，不過因為運動由學生主導，幾乎係學聯玩晒，令民陣由頭到尾都得唔到一個當眼位置。之後佔領行動結束，民陣主辦嘅拒絕政改袋住先運動及七一遊行均慘淡收場，令民陣進退失據，亦令多位正副召集人無心戀戰。
現任召集人陳倩瑩喺一年莊期內經歷佔領行動失敗、遊行人數驟降等重大打擊，簡直係心力交瘁，亦因為民陣召集人個位不可留任，所以佢應該唔會競逐，專心做議員助理工作。至於現時三個副召集人，本身做過召集人嘅楊政賢就話會修讀法律碩士，亦會返中大做兼職，要忙功課又要返工，根本無時間應付民陣工作，大條道理唔接手。而另一副召集人、香港彩虹嘅岑子杰亦都會重返校園，去理大讀副學位課程。
老鬼話多夾人上去做
現時呼聲最高就係另一副召集人、做過學聯秘書長嘅陳樹暉，事關咁多個人選之中，佢社運經驗最豐富，又未做過召集人，唔驚被外界批評又「圍威喂」翻炒。不過，佢本人就話唔多想，反而想專心天主教正義和平委員會及警權監察嘅工作。有民陣老鬼話，其實之前每屆嘅召集人好多起初都扭扭擰擰唔肯做，但最後都被人夾上去做，睇嚟樹暉要走得甩都唔係咁容易喇，除非企硬唔做囉？