中環出更：埋單計數 政改廣告日播169次
政改方案喺大比數反對下遭否決後，相關議題仍然受到關注，其中一個就係宣傳費用。早前就有立法會議員以政改宣傳浪費公帑為由，多次要求政制及內地事務局公開相關資料，直到最近終於有眉目。根據當局嘅最新資料顯示，政府喺今年四月底至六月中期間，透過電視台及電台播出嘅宣傳短片及聲帶多達九千八百幾次，即係平均每日播近一百七十次。雖然政府好揼本，但成效係點唔使多講喇！
連印製品共耗500多萬
政改宣傳開支方面，單係印製《諮詢報告及方案》、印製宣傳海報及單張、設計及製作電視宣傳短片及電台宣傳聲帶等，已經花咗五百多萬元。此外，由今年四月二十二日、即係政府公布終極政改方案開始，直至六月十八日政改表決期間，政府分別喺五間電視台播放「2017：一定要得！」宣傳短片達五千二百三十八次，同時喺五間電台播放宣傳聲帶四千五百九十次，即係合共播出九千八百二十八次宣傳短片及聲帶，平均每日播一百六十九次。
其實每日播一百六十九次宣傳廣告算係好誇張，可惜在泛民主派綑綁式投票及建制派「甩轆」等多個因素影響下，政改最終遭到否決，真係嘥心機兼倒錢落海。
卓妮