魯迅講過︰一部《紅樓夢》，經學家睇到《易》；道學家睇到淫；才子睇到纏綿；革命家睇到排滿。其實科技都係一樣，正當人家睇到生活便利；而喺不法之徒眼中就係一條財路，如果唔係，警方就唔使設立科技罪案調查科喇。
嗱，好似近年大行其道嘅立體打印技術咁吖，只需一張照片就可以進行複製，飾物、科研模型、汽車零件、橋樑甚至太空站都得，用途廣泛，打印人人必備嘅鎖匙更加小兒科。本報記者委託立體打印專家測試「科技配匙」，發現唔單止可以完全複製，仲可以成功開鎖，整個過程只需十五分鐘。據講呢啲小型立體打印機成本超低，最低幾千銀已經有交易，而每條塑膠匙嘅成本更低至五毫子，平過幫襯鎖匠多多聲。專業鎖匠都話喇，由於掛鎖、十字鎖以至冇附帶晶片嘅車門鎖等，只係靠形狀同坑紋唔同加以識別，全部可以利用立體打印技術複製。
不過有一利必有一弊，大家有冇諗過，如果賊人利用立體打印技術複製鎖匙，入屋爆竊咪易過借火？唔好唔記得，以前配匙要拎去鎖匠度一對一複製，萬一出事仲可以一層層查落去，家陣利用立體打印技術，不求人搞掂晒，分分鐘可以神不知鬼不覺。
唔係杞人憂天。外國曾經有人將槍械嘅立體打印圖放上網供人下載，結果因為爭議太大，先至將打印圖下架。香港情況都唔好得去邊。今年六月警方喺西貢粉碎激進組織恐襲陰謀，喺佢哋嘅大本營裏面，除咗檢獲大批炸藥同槍械，亦搜出一部立體打印機，到底用嚟做乜，相信畫公仔唔使畫出腸喇啩。
即係咁，科技潮流浩浩蕩蕩，順之者昌，逆之者亡，因噎廢食始終唔係辦法。家陣唯一可以做嘅就係執法部門與時俱進，加強監管。不過咪話功夫茶潑冷水，港產官僚出名後知後覺，一本通書睇到老，潮流嘅嘢佢哋識啲乜吖！例如美容服務，一時熱石美容，一時激光脫毛，一時延長睫毛，五花八門，花臣多多，可惜相關法例十年如一日，加上監管部門放任自流，導致唔少市民美容變毀容，甚至搞出人命。又例如近排某台灣名牌三文治食物中毒風波，唔少受害者都係喺網上購買嘅，但原來港府一直對網購無監無管，有乜法子唔出事吖。仲有電話騙案，雖然唔算高科技，但一樣禁之不絕。所以話，旨意港府把關，慳番啖氣暖吓肚好過喇。
講到呢度，功夫茶有少少懷疑，呢班官老爺胡混度日，返工好似發夢咁，唔通佢哋都係立體打印出嚟嘅複製品，有樣冇靈魂？