政改方案表決當日建制派喺投票一刻拉隊離場，結果發生世紀甩轆事件，事後外界普遍認為主張「等埋發叔」嘅經民聯副主席林健鋒（Jeffrey），以及建制派「班長」兼民建聯黨鞭葉國謙需要負上最大責任。曾經就事件含淚道歉嘅Jeffrey，喺政改表決後尋日首次接受電台訪問，佢話建制派之間嘅團結同互信好重要，要絕對相信班長指示喎。不過，當日唔跟大隊離場、留守會議廳投票嘅自由黨田北俊曾經講過，唔認同建制派有黨鞭可以號召集體離場，咁Jeffrey嘅諗法會否係一廂情願呢？
