政情：斬樹問責雙鴿鬥卸
路政署日前突然斬去半山般咸道四棵石牆樹，之後民主黨（白鴿黨）嘅兩個中西區區議員許智峯同鄭麗琼（King）都去到般咸道掛晒氣球，做足大龍鳳話要哀悼石牆樹，又話不滿當局冇盡早通知。查實路政署喺事發當晚約七點半鐘，已經以電郵通知各區議員，但除咗當區議員陳捷貴同另一議員蕭嘉怡有喺斬樹前到場視察外，其他議員都冇盡力阻止斬樹。兩隻白鴿事後就解釋，一個話睇唔到文件，另一個就話諗唔到咁快會斬樹喎！
許智峯承認有收過電郵，但竟然當晚冇睇到！佢話封電郵上周五晚傳過嚟，再細心勤力嘅同事，都冇可能睇到，唔可以話係議員疏忽，而係當局特登揀嗰個時間通知議員，係想避過爭議喎！原來作為咁關心居民嘅區議員，周五晚唔睇電郵，唔知周五晚仲要收老闆電郵嘅打工仔會點諗呢？
鄭麗琼睇咗電郵都唔嚟
許智峯又話，成件事責任係在於當晚喺現場嘅兩位區議會同事，即陳捷貴及蕭嘉怡，點解冇即場阻止斬樹。問佢如果喺現場會點做？佢話會阻止同表達呢件事未諮詢區議會，如果當局堅持斬樹，就會報警喎！唔睇電郵就賴人，唔知份糧係咪要畀埋到場兩位區議員呢？
至於阿King就勤力過許智峯，當晚睇到封電郵，但入面提到「署方決定盡早移除四棵石牆樹」，佢就話冇諗過即晚就斬樹，都有少少後悔冇問清楚民政事務專員。佢又話，當晚十點幾先收到街坊通知斬樹，即時將附近警署個電話號碼畀咗街坊，如果一早知道，就會叫齊記者到現場，阻止件事發生。講真嗰句，如果真係緊張啲樹，就唔係將警署電話號碼畀街坊，而係親身落去阻止啦！
陳捷貴引述「颱風影響」
另外，當日路政署通知區議員有關緊急斬樹的電郵文件，內容完全沒有提及到超級颱風蘇迪羅嘅影響，陳捷貴回應話，當日中西區民政事務處曾喺電話中提及超級颱風對石牆樹嘅影響，及後佢到石牆樹現場視察時，路政署人員亦有提到超級颱風對石牆樹的影響喎。不過，當日天文台一早講咗蘇迪羅唔會正面吹襲香港，何解路政署人員要借蘇迪羅過橋呢？