中環出更:青聯「梁」言:捱苦才能成長

好多家長都安排子女參加暑期課外活動,但一般小朋友都怕熱、怕曬、怕辛苦,坊間機構就轉型搞皮革製作、咖啡店實習等「潮班」吸客。不過,香港青年聯會(青聯)秘書長梁毓偉(Kenneth)就話活動要辛苦,青年人先至會成長。而青聯常務副主席吳傑莊(Johnny)都話,過往唔少大學生參加佢哋嘅內地交流團時都嫌三嫌四,但佢堅持唔會遷就學生,覺得捱吓苦先會學識獨立。

坊間好多僱主都話時下年輕人唔捱得,早前Johnny出席一個青年學生活動憶述,佢去年搞嘅大學生內蒙古交流團嘅時候亦有同感︰「大熱天時佢哋冇熱水沖涼又投訴、見到曱甴昆蟲又話驚,就連活動面試都要家長陪。」

睇「差嘢」學懂感恩知足

Johnny覺得家長太緊張,年輕人又舒服慣,先至會咩都投訴一餐。雖然坊間有「潮班」遷就唔捱得嘅後生仔,但Johnny就話唔會遷就佢哋,否則唔會學到嘢喎。

搞過幾次中學生貴州義教活動嘅Kenneth亦話,一定要畀年輕人睇到啲「差嘅嘢」,佢哋先會學識感恩同知足,又話之前貴州義教活動,香港學生要送貴州山區小朋友返學,淨係去學校都要步行個半鐘,雖然辛苦,但見到學生返到香港脫胎換骨,覺得捱吓苦先會成長。

不過,青聯主席范駿華話,有時搞戶外活動,真係大熱天時都避無可避,但佢就教路可以帶備一啲濕水變冷嘅運動毛巾,仲有近期好hit嘅風扇仔,咁就冇有怕啦。

卓妮

第一手消息請下載on.cc東網iPhone/iPad/Android/Windows Phone Apps