鉛水風波愈演愈烈，連興建中嘅公屋都未能幸免，搞到人心惶惶。其實今日香港危機處處，唔單止食水有事，唔少食物亦有鉛禍，令人防不勝防。
唔係靠嚇o架。本報踢爆，目前本港監管食物重金屬含量嘅法例，原來係三十二年前制訂，已經嚴重落後於國際標準。好似含鉛量咁吖，本港規定豬、羊、雞等肉類製品嘅上限，足足比國際食品法典委員會嘅標準寬鬆六十倍；而蔬菜亦寬鬆二十倍。好嘞，唔同外國比，同黑心食品氾濫成災嘅內地比又點呢？答案係內地比香港更嚴謹，問你服未。幾年前有大學檢測多個蔬菜樣本，發現含鉛量超出歐盟、澳洲等國際標準，部分超標近兩倍，但仍然低過本港標準，你話係咪匪夷所思吖？
最離譜嘅係，即使沿用呢個超低標準，近年仍然發生多宗食物含鉛量超標個案。正如有醫學界人士話齋，鉛毒對人體骨骼及神經系統造成好多後遺症，可能導致慢性腎病、血壓高、神經線發炎甚至影響腦部發育。特別係孕婦，懷孕十四周時鉛毒可以去到胎盤，直接影響胎兒，唔係講玩o架。
食物安全，關乎人命，點解當局唔收緊標準？唔講猶自可，一講把幾火。原來港府早喺○七年已經話要檢討食物安全標準，點知拖咗四年，食安中心至成立工作小組進行研究，家陣又過咗四年，依然無聲無息，有小組成員連要修例都一無所知。有學者就講得啱嘞，國際標準經過實踐檢驗，證明可行，本港如果有意跟進，根本唔使四年咁耐。好明顯，提高食物安全標準一啲都唔難，食安官僚非不能也，實不為也。
見微知著，食安標準三十二年如一日，正正反映港府墨守成規，得過且過。最近台灣發生懷疑由三文治引發嘅食物中毒事件，本港亦受到牽連，近百名市民中招，當中唔少人透過網上訂購。食物及衞生局局長高永文承認現行法例對網購進口食物缺乏監管，承諾研究及檢討。查實網購早就大行其道，涉及嘅糾紛同投訴亦與日俱增，港府依家至話檢討法例，仲有冇再遲啲吖。
所以話，食安危機長爆長有，有毒食品氾濫成災，蘇丹紅蛋、孔雀石綠魚、過期肉、坑渠油……五花八門，無奇不有，唔係冇原因o架。官僚胡混度日，法例形同虛設，問題食品咪長驅直入，如入無人之境囉。
開講有話︰民以食為天，食以安為先。今時今日香港人連飲水都要提心吊膽，連食嘢都要望天打卦，諗落都幾可悲。