潮流興談論「怪獸家長」，其中一個特點就係暑假期間幫子女安排好多課外活動。我哋喺早前喺全民運動日，撞到中西區區議員陳學鋒帶埋太太同兩個仔捧場。學鋒同太太講到明，主力安排戶外活動畀兩個仔，最多游泳加英文班，皆因佢唔想變成怪獸家長喎。可能男仔比較好動啲，學鋒嘅七歲大仔平時除咗踢足球外，仲同五歲細仔學跆拳道，睇番當日兩兄弟拳來腳往嘅「表現」，似乎學得唔錯喎！
