政情：推動漂書 區議員割愛

灣仔區區議員伍婉婷響應活動，將有關灣仔典故嘅書拎去漂，佢仲寫上「情書」畀有緣人，分享感想。佢話每次漂書都會有「賣仔莫摸頭」嘅感覺，因為唔會再有機會去睇，所以漂書令佢重新閱讀。紫荊青年商會會長魏文珊同樣唔捨得舊書，但認為漂書有助宣揚閱讀文化、減少依賴電子產品，割愛都有價值。

另一區議員鍾嘉敏都係愛書之人，一向有儲書習慣。佢話樂意參與漂書，但唔捨得啲珍藏，因為唔同版本包裝、設計上都有分別，所以會選擇買多一本去漂同人分享。鍾議員第一次參與漂書，已經即場搵到心頭好，有緣將佛學書籍帶返屋企。

漂書已經進入食肆，但礙於衞生問題，每本舊書都要先消毒再放漂。主辦單位話下一步會去基層學校宣傳，繼續推動社會閱讀風氣。