政情：八網難逃：林卓廷爭取「檜商精」 嚇退騙徒
詐騙電話愈打愈猖狂，對象不分政治立場，泛民、建制都照呃。尋日我哋報道過，民建聯立法會議員陳恒鑌收到聲稱安徽省政協秘書長來電，話要將佢由普通省級政協委員升呢做政協常委，希望藉此騙財。做過廉政公署調查主任嘅民主黨總幹事林卓廷（阿廷），尋日亦喺社交網站自爆收到疑似詐騙電話，但騙徒最後被佢「檜商精」三隻字嚇退咗。乜嘢係「檜商精」？原來係指「回鄉證」喎！
對方自稱中旅社
阿廷透露，尋日朝早喺屋企接到一個境外電話，對方自稱係「中國旅行社」，佢心諗唔通中央想發番啲回鄉證畀佢班黨友？於是立即按錄音指示按０字，之後有個操普通話嘅男子接聽，阿廷就使出佢極度有限的「煲冬瓜」（普通話），向對方講「屍汪爭廚檜商精」（希望爭取回鄉證），嚇到該名疑似騙徒講兩句就收咗線，連拜拜都冇講。可能對方見橫掂溝通唔到，費事連電話費本錢都嘥埋。
（互聯網）