政情：第三路線 泛民建制票

「新思維」強調自己代表溫和理性，反對暴力激進，目標係喺日益激化嘅民主黨、公民黨手中，"介"走一至兩成嘅中間派選票。「正義聯盟」就強調自己係「行動派」，暗批傳統建制派「做唔到嘢」，明搶民建聯、工聯會等建制大黨嘅票源。兩個新政黨嘅成立，好聽啲就係百花齊放，難聽啲講，就係擺明攪局同埋"介"票，肯定會令未來兩場選舉亂上加亂！

「新思維」謀合作未成事

本報早前率先報道黃成智與民主黨前立法局議員狄志遠計劃另組新黨嘅消息，近日新黨嘅名稱終於曝光，暫時叫做「新思維」。據悉該黨有意與同樣走「第三路線」、目前定位為論政平台嘅「民主思路」加強合作，希望有志披甲參選嘅「民主思路」成員加盟「新思維」，唔想參選嘅就繼續留喺「民主思路」做政策研究等工作，有啲近似現時新民黨與匯賢智庫嘅關係，但係咪成事仍是未知之數。

由於註冊及籌款需時，預計「新思維」將趕唔切喺十一月區議會選舉前成立，但肯定會派人參加明年九月嘅立法會換屆選舉。若該黨最後喺新界東西取得一至兩個立會議席，再加多幾名區議員，影響力最少拍得住現有嘅泛民政團民協及新民主同盟。至於明初嘅立法會新界東補選，該黨仍然十五十六，未決定會否派人出戰。

由李偲嫣擔任主席嘅「正義聯盟」黨，尋日就搶閘宣布成立，並手執象徵正義嘅寶劍道具，號稱已有約一千六百名黨員，即係仲多過民主黨同公民黨加埋！

正義聯盟「掃垃圾」

佢哋自稱又係走「第三路線」，與現有建制派政黨嘅分別係「行動派」及「做到嘢」。至於佢哋會派幾多人參與嚟緊兩場選舉、會落邊區等，李偲嫣就大賣關子，僅稱「邊區有垃圾就去邊區，我哋專掃垃圾」喎。

經費方面，李偲嫣自言佢哋係最窮困政黨，皆因佢哋唔似啲泛民政黨咁有壹傳媒集團前主席黎智英做金主照住。至於會否與建制派協調選舉，佢就話溝通吓都無妨，但係就一定唔會屈服於任何威逼或利誘。新黨一成立已周圍辣火頭，政壇嚟緊真係好戲連場！