中環出更：弘揚國術 武林秘笈面世
中國武術名震天下，但熱衷習武嘅香港人唔算太多。為咗進一步推廣武術文化，香港國術總會會長王嘉恩（Albert）、副會長周國豐（Brandon）聯同詠春師傅江志强，聯手編纂一本講述城中不同武林門派嘅著作《武林薈萃》。新書發布會當日，多位本地武林名宿與政商名人都有捧場，其中冠忠巴士集團董事鄭敬凱（Andrew）及太子珠寶鐘錶執行董事朱鄧麗萍，都同武術好有淵源。
鄭敬凱懂「心口碎大石」
Andrew都係習武之人，年少時受李小龍影響，十五歲拜師學習五組拳，廿多年來都有持續鍛煉拳法與氣硬功，因此佢亦懂得如何施展「纓槍刺喉」同「心口碎大石」等氣功絕技。
佢話，習武後明白到拳腳可以傷人甚至攞命，為免惹禍凡事都會三思而行。至於朱鄧麗萍亦同武術好有淵源，佢話爸爸係武術教練，童年時經常要清晨六點起床隨爸爸到九龍公園習武，由於佢嫌習武刻苦，長大後轉向商界發展。
Albert話國術總會之所以致力推廣國術，係期望大家從習武當中領略到中國傳統智慧與德行，以及培養正面思維，可抵銷香港日益瀰漫嘅怨氣同負面情緒。雖然習武好處多，但係要推廣國術，場地係一個令人頭痛嘅問題。
周國豐倡藉學校推廣
Brandon話昔日嘅師傅，大多數於舊唐樓或天台設館授徒，然而舊區重建令到適合授武嘅場所愈來愈少，長遠涉及土地供應問題，並唔容易解決，應對之道係藉學校去推廣武術。
Albert嘅老友、立法會議員陳克勤就話好佩服習武人士嘅體格同意志，佢憶述數年前參選時，有人提議佢同黨友劉江華舞獅宣傳，結果佢舉起沉重嘅獅頭只不過幾分鐘就雙手發軟喎。
卓妮