政情:殘局留港大 金刀梁休想逃

香港大學副校長任命風波,演變成學生衝擊及佔領校委會會議、禁錮校委事件,校委之一嘅盧寵茂更加喺混亂中受傷送院。有校委會委員認為,校委會一早夠票否決任命法律學院前院長陳文敏擔任副校長,但係年底退休嘅校委會主席梁智鴻(金刀梁)一直想拖延,唔想喺佢任內做決定,先造成依家嘅亂局同困局。唔少委員認為,金刀梁一定要「啃埋佢」至好走,唔可以留畀下任主席孭鑊。

早於審核秘捐調查時可否決

港大校委會早前以「等埋首席副校長」為理由,遲遲未決定係咪任命陳文敏做副校長。有委員指出,校委會根本夠票否決,只係在於夠唔夠膽早啲投票,因為過往校委會好少唔通過遴選委員會嘅決定。有委員話,早於校委會討論審核委員會對佔中秘密捐款嘅調查結果時,就應該否決任命陳文敏,認為最終否決嗰陣,都係要被人鬧,不如一次過鬧晒佢,免除後患,即係叫金刀梁早應審時度勢作出適當決定。

有委員就質疑,金刀梁年底即將退休,不斷延遲任命副校長決定,係想將個波交畀下任主席,自己就能夠全身而退,而「等埋首席副校長」根本冇意義,仲令到事件愈鬧愈大。任命風波如今搞出個大頭佛,校委會都好難搵人接任主席。之前盛傳委員李國章將會接任,但亦有人擔心佢嘅強硬作風會引起反感;亦有傳曾經搵過嶺南大學校董會前主席陳智思接任,不過有指嶺大選校長嗰陣,都搞到滿成風雨,嚇到佢驚咗唔敢做。

憂難覓接班 「梁最好做多年」

無論最終搵邊個接任主席,一上場都要硬食「副校長風波」,睇嚟都好難搵人肯「捱義氣」喇。有委員就話,延遲任命副校長冇問題,金刀梁最好做多一年,自己搞番掂壇「蘇州屎」先至好走。其實港大校委會搞到咁嘅田地,莫講話主席一職難撈,再有冇人肯做委員都成問題,事關做得呢啲位,個個唔係專業人士就係有頭有面,點解要受港大生嘅氣呢?如果再係咁落去,捐錢畀港大嘅商界大孖沙都閂水喉添呀!

第一手消息請下載on.cc東網iPhone/iPad/Android/Windows Phone Apps