中環出更：工總換屆宴 大搞爛Greg騷
城中四大商會之一嘅香港工業總會早前舉行換屆暨周年晚宴，由做環保生意嘅正昌集團主席鄭文聰（Daniel）接替劉展灝（Stanley）成為新主席。近排放長假嘅商務及經濟發展局局長蘇錦樑（Greg蘇）突然返一日工，原來夜晚應承出席工總晚宴夾Band做騷，佢一上台就同Daniel搞爛Gag，寸盡政壇熱爆嘅炒局長風波及政改投票「甩轆」事件，唔知係咪趁機發洩外傳佢一度被列炒魷名單嘅不忿呢？
Greg蘇首先恭喜Daniel榮任主席，話口未完就問Stanley係咪樂意退任㗎？Daniel答梗係喇，事關Stanley平步青雲做咗生產力促進局主席喎！Greg蘇就話Stanley不如叫做「劉青雲」啦！Greg蘇之後撩做環保生意嘅Daniel擔任全城清潔行動大隊長，因為做隊長都幾平步青雲，暗諷統籌全城清潔嘅政務司司長林鄭月娥，幸好當時林鄭已離場，聽唔到佢亂咁噏嘢。
「一旦被炒魷 搵劉展灝收留」
最後Greg蘇仲藉機澄清話，最近流行有啲咩動物（豬）嘅隊友，自言唔係講緊佢，因為佢屬狗，狗係好得人鍾意嘅，仲話好感謝Stanley話一旦佢被炒魷，會考慮收留佢喎！查實Stanley都卸任啦，係都搵新主席Daniel收留佢啦！
公職多多嘅Stanley係城中大忙人，卸下工總主席後都冇得抖吓，旋即接任生產力促進局主席。佢笑稱工總仍有好多未完嘅任務有待Daniel跟進，至於係乜就有排數喎！不過，Daniel早已心中有數，一上任就發表大計為業界爭取更好嘅營商環境。至於八月下旬先至返工嘅工總候任總裁何健華當晚都有現身，佢笑稱好期待，有信心勝任新工。
卓妮