古人話，有諸內必形諸外。公立醫院事故頻生，醜聞不絕，雖然有好多原因，但醫管局內部問題多多，烏龍百出，絕對係主要原因。正如「東方報業民意調查」顯示，大部分受訪者批評醫管局管理無方，資源錯配，搞到成個公共醫療系統七國咁亂。
講到醫療事故，就不能不提最近多間公立醫院爆發嘅霉菌危機，淨係瑪麗醫院就有多名病人中招，最少兩人死亡。追查後至發現，負責多間公立醫院及診所洗衣服務嘅外判洗衣場懷疑係霉菌源頭，洗淨後嘅衣物含霉菌比例高達三分之一，都咪話唔得人驚。最離譜嘅係，爆發霉菌危機後，多間公立醫院仍然唔識吸取教訓，居然將洗淨後嘅衣物隨處擺放，甚至同污衣及垃圾一齊放喺手推車上，你話有乜法子唔出事吖。
呢，「東方報業民意調查」顯示，對於公立醫院被服含霉菌，四成二受訪者認為外判服務質素參差；三成三直指當局失職，監管粗疏；一成四擔心公院存在衞生危機。
話時話，今次已經唔係瑪麗醫院第一次發生同類事件，六年前亦因為藥物發霉而導致多名病人死亡，照計應該吸取教訓至係，點知事實啱啱相反，院方繼續敷衍了事，卒之又爆大鑊。上述民調顯示，四成九人直指監管不力導致悲劇重演；兩成一批評瑪麗醫院冇吸取教訓；一成七擔心病人毫無保障。
市民嘅擔心唔係杞人憂天，成個公共醫療系統甩漏多多，瑪麗醫院固然亂晒龍，其他公立醫院亦唔好得幾多。好似屯門醫院咁吖，居然鬧出雌雄不辨嘅笑話，將男女病人嘅肝酵素參考數據對調，近萬人受影響。咪以為係小事吖，醫療數據出錯，分分鐘影響診斷，貽誤醫療時機，後果可大可小o架。
一葉知秋，瑪麗同屯門醫院嘅亂象，只係成個公共醫療系統百病叢生嘅縮影咋。正如立法會議員話齋，醫管局一味肥上瘦下，前線醫護人員士氣低落，乜嘢亂象都會發生喇。講開又講，兩年前港府成立檢討督導委員會，聲稱要全面改革醫管局，點知又係雷大雨小。係人都知，七個醫院聯網早就淪為七個山頭，勾心鬥角，爭權奪利，導致資源分配不均，前線人手長期短缺，當局唔敢動大手術，所謂檢討純粹做騷咋。聽吓市民點講喇，四成六受訪者批評醫療改革建議換湯不換藥；一成九直指小修小補，作用不大；一成七怒轟當局敷衍塞責。
點講都好喇，治亂世用重典，治沉疴用猛藥。公共醫療系統千瘡百孔，如果當局繼續諱疾忌醫，醫療亂象只會陸續有來吖！