泛民主派尋日搞咗個退修營，傾吓未來發展路向，共有十六名議員出席。閉門傾咗成日得出咩結果呢？泛民飯盒會召集人梁家傑（袋巾傑）聲稱，大家嘅共識之一係樂意同中央溝通。不過泛民成日將呢句話掛喺嘴邊，真係有機會同北京溝通時，一係玩杯葛，得小貓三四隻赴會，一係就帶埋傳單去派街攪亂檔，只係得把口。
今次退修營由朝開到晚，民主黨及工黨最畀面，全部議員到齊晒。唔知係咪攰得滯，會後一眾議員排排坐見傳媒時，坐喺後排嘅民主黨何俊仁疑似瞌眼瞓，冇嚟神氣。
講到會議成果，就真係令人瞌眼瞓。除咗上述了無新意嘅善意溝通之外，飯盒會又整色整水，話要將飯盒會模式延伸至全港十八區，喺各區成立會議平台，發掘議題跟進。袋巾傑下個立法年度就會退任飯盒會召集人，交棒畀工黨何秀蘭。