中環出更：慈善賽發茅 長毛遭踢傷
連續多年舉辦嘅無家者世界盃慈善籌款足球賽，尋日喺旺角麥花臣足球場舉行。政商界名人繼續瞓身落場踢埋一份，包括立法會議員梁國雄（長毛）、立法會議員梁志祥及郭偉強等人，平日西裝筆挺嘅港交所行政總裁李小加都換上波衫落場踢，腳下功夫唔錯，成為全場焦點之一。至於去年被人掃低嘅長毛就出茅招攬對方球員條腰被吹罰，最終更都逃唔過被人踢傷嘅下場，搞到隻腳又紅又腫添！
一開波時長毛係後備，但就扮領隊喺場外指指點點，一時叫隊友郭偉強去呢度、去嗰度，到佢上場時就粗粗魯魯，同對方爭波時有碰撞，但球證都隻眼開、隻眼閉冇吹罰。長毛成功搶咗個波之後用個背脊擔住對方，對手一怒之下出腳，仲踢中長毛右腳，球證即刻吹罰。
李小加郭偉強有士哥
不過，得到罰球機會嘅長毛再次領隊上身，老點隊友李小加去呢度、去嗰度接波，拖咗勁耐都唔發球，搞到球證同司儀都忍唔住叫佢「快啲啦」！賽後影大合照時長毛突然大叫：「香港精神，踢波唔踢人」，睇嚟隻腳實好痛喇！
至於李小加就踢得有板有眼，仲入咗一球添！原來佢十五歲開始踢波，閒時仲會同港交所啲同事切磋球技。
球技一般嘅郭偉強就矇查查，場波開始咗，佢竟然仲周圍搵隊友。佢落場踢咗大約五分鐘就上氣不接下氣，仲賴話因為冇熱身喎！但好波不及好運，下半場都畀佢入咗一球。至於議員張超雄就遲大到，完場先出現，佢話自己老，唔踢啦！
卓妮