西九文化區前後講咗十幾年，依家仲係爛地一塊，幾時至可以成為世界級文化藝術中心，連港府都冇答案，大家只知道錢已經使咗唔少，行政總裁換完一個又一個，而且全部係洋人，唔到你唔服。
呢，當局日前委任前港府政務官栢志高為西九文化區管理局行政總裁，接替下月三日提早離任嘅連納智，連同前任行政總裁謝卓飛，三位行政總裁清一色係洋人。最奇怪嘅係，西九董事局幾個月前曾就行政總裁一職展開全球招聘，點知左揀右揀，最後又係揀到一位退休洋高官，唔怪得有人話西九除咗係「洋人俱樂部」，仲成為「退休高官俱樂部」。好多人諗極都唔明，唔通只有外國人至有資格擔任呢個職位？抑或冇本地人肯接手呢個爛攤子？
港產官僚就係咁嘅喇，一味崇洋媚外，以為洋和尚至識得唸經，點知次次都係唸壞經，搞到醜聞多多，笑話百出。首任行政總裁謝卓飛做咗五個月就以健康理由閃電請辭；第二任行政總裁連納智完成任期並獲續約後，亦因健康理由提早離任；依家輪到栢志高，當局睇怕要求神拜佛望佢健康唔好再出問題，否則隨時又係半途而廢咋。
即係咁，洋人又好，華人又好，邊個擔任西九行政總裁都唔係問題，最緊要係能者居之，可惜吖，栢志高除咗係資深政務官及前特首曾蔭權爵士嘅愛將之外，全無文化藝術經驗，究竟可唔可以勝任呢個職位，實在令人懷疑。仲有吖，栢志高早年擔任香港駐布魯塞爾歐洲共同體特派代表時，曾被指為貪曾「穿針引線」，安排佢與教宗會面，被批評濫用公職。正如有立法會議員質疑，栢志高根本唔符合聘用要求，當局點解要改變聘用條件，仲欠公眾一個交代。
其實都唔使質疑囉，港府最擅長官官相衞，舊年十月委任栢志高擔任營運總裁時，已被指為接任行政總裁鋪路，結果真係畀人估中。西九文化區十畫未有一撇，但管理層就不斷膨脹，近年新增多個高層職位，包括增設副主席一職，搞到尾大不掉，再咁落去，多多錢都唔夠喇。最好笑嘅係，由於工程一波多折，又延誤又超支，原有嘅二百幾億元資金僅夠興建第一期及第二期工程，第三期工程仲未有着落，除非栢志高有本事化腐朽為神奇喇，否則隨時爛尾收場都似。
所以話，官僚無能唔緊要，好大喜功最攞命。香港係文化沙漠，當局偏偏要打造所謂世界級文化藝術中心，點可能唔搞到一鑊泡吖。咪畀功夫茶睇死，栢志高上場後，西九醜聞可能陸續有來。