政情：今日你上鏡：局長「執包袱」 畫中露玄機
政府前日宣布免去原民政事務局局長曾德成同公務員事務局局長鄧國威職務，令外界為之震驚。不過，有讀者就發現銅鑼灣一間名人食堂內嘅一幅大型素描畫作早已洞悉先機。讀者報料話，該食肆一幅七尺長畫作畫有三司十二局官員，當中疑似表達有兩個局長下台。
睇番嗰幅畫，三司十二局問責官員個個畫得栩栩如生，眾人喺巴士站等緊去該餐廳嘅巴士，而除咗曾德成同鄧國威係拖篋、貌似執包袱走人之外，其他人都係輕裝上陣，而呢幅畫作所註日期為今年五月。
報料讀者就認為畫作內有玄機，已清楚表達兩名局長將會下台，而且五月中已經知道，又話「上天早有定數」。食店東主就話，畫作係一位年長熟客送贈，呢位熟客已多次送畫畀佢哋，但就唔肯透露呢位熟客嘅身份喇。